പ്രസവശേഷം എന്നെ ഇങ്ങനെ സ്വീകരിക്കുമെന്ന് കരുതിയില്ല”; ദിയ കൃഷ്ണയുടെ വാക്കുകൾ വൈറൽ

 

അഹാന കൃഷ്ണയുടെ വിവാഹത്തിന് പിന്നാലെ ആഘോഷങ്ങളുടെ മനോഹരമായ ചിത്രങ്ങളും വീഡിയോകളും ഒന്നിന് പിന്നാലെ ഒന്നായി സോഷ്യൽ മീഡിയയിൽ എത്തുകയാണ്. വർണാഭമായ ചടങ്ങുകളാണ് ആരാധകരുടെ ശ്രദ്ധ നേടുന്നത്.

സം​ഗീത് നൈറ്റിൽ ചുവപ്പ് നിറമായിരുന്നു പ്രധാന തീം. അഹാനയ്ക്കൊപ്പം സഹോദരിമാരും മാതാപിതാക്കളും സുഹൃത്തുക്കളുമെല്ലാം വേദിയിലെത്തി നൃത്തം ചെയ്തു. എന്നാൽ ഡാൻസ് പെർഫോമൻസിൽ ഏറ്റവും കൂടുതൽ ശ്രദ്ധ നേടിയത് ദിയ കൃഷ്ണയായിരുന്നു. ദിയയുടെ ചുവടുകളും വേഷവുമെല്ലാം സോഷ്യൽ മീഡിയയിൽ വലിയ പ്രശംസ നേടി.

സം​ഗീത് നൈറ്റിനായുള്ള തയ്യാറെടുപ്പുകളെക്കുറിച്ചും അഹാന കൃഷ്ണ പങ്കുവെച്ചിട്ടുണ്ട്. വർഷങ്ങളായി പ്രിയപ്പെട്ടവരുടെ വിവാഹങ്ങളിൽ നൃത്തം ചെയ്തിരുന്ന തനിക്ക്, സ്വന്തം വിവാഹത്തിൽ നൃത്തം ചെയ്യാനുള്ള അവസരം ലഭിച്ചപ്പോൾ അത് പരമാവധി ആസ്വദിക്കുകയായിരുന്നുവെന്ന് അഹാന പറഞ്ഞു. എല്ലാവരെയും ഒരുമിച്ച് വേദിയിലെത്തിച്ച് പെർഫോം ചെയ്യുന്നതിനായി മാസങ്ങളോളം പരിശീലനവും നീണ്ട പ്ലാനിംഗും നടത്തിയിരുന്നെന്നും താരം വ്യക്തമാക്കി.

അതേസമയം, തന്റെ ഡാൻസ് പെർഫോമൻസിന് ലഭിച്ച സ്നേഹത്തിനും പ്രശംസകൾക്കും ദിയ കൃഷ്ണയും നന്ദി അറിയിച്ചു. പ്രസവത്തിന് ശേഷമുള്ള തന്റെ പുതിയ ശരീരത്തിലും പഴയതുപോലെ തന്നെ തന്റെ ഡാൻസ് പ്രേക്ഷകർ സ്വീകരിക്കുമെന്ന് കരുതിയിരുന്നില്ലെന്നും, കമന്റ് സെക്ഷൻ കാണുമ്പോൾ ഏറെ സന്തോഷം തോന്നുന്നുവെന്നും ദിയ കുറിച്ചു.

കൃഷ്ണകുമാർ, സിന്ധു കൃഷ്ണ, അഹാനയുടെ സുഹൃത്തുക്കൾ തുടങ്ങി കുടുംബത്തിലെ നിരവധി പേരും സം​ഗീത് വേദിയിൽ നൃത്തം ചെയ്തിരുന്നു. ആഘോഷത്തിന്റെ ഓരോ നിമിഷങ്ങളും ഇപ്പോൾ സോഷ്യൽ മീഡിയയിൽ വൈറലാകുകയാണ്.